Prishtinë, 7 tetor 2024 – Komisioni Qendror i Zgjedhjeve mbajti mbledhjen e 53-të në këtë vit, të kryesuar nga kryesuesi i KQZ-së, Kreshnik Radoniqi.

Në fillim të mbledhjes u prezantua raporti lidhur me ecurinë e zbatimit të planit të aktiviteteve për organizimin e Zgjedhjeve për Kuvendi ne Kosovës, të cilat do të mbahen më 9 shkurt 2025.

• Është duke vazhduar periudha e aplikimit për regjistrim të votuesve jashtë Kosovës, e cila ka filluar më 29 gusht dhe do të përfundojë më 26 dhjetor 2024. Në bazë të të dhënave, deri më 6 tetor 2024, përmes platformës elektronike http://diapsora.kqz-ks.org janë pranuar 6,069 kërkesa për regjistrim, prej të cilave janë aprovuar 5,571, ndërsa 498 të tjera janë refuzuar. Në shumicën e rasteve të refuzuara, aplikuesit nuk janë fotografuar duke mbajtur njëkohësisht në dorë dokumentin e identifikimit.
• Gjithashtu, është duke vazhduar periudha për ndërrimin e Qendrës së Votimit brenda komunës, e cila ka filluar më 29 gusht dhe do të përfundojë më 26 dhjetor 2024. Në bazë të të dhënave, deri më 6 tetor 2024 janë pranuar 744 kërkesa për ndërrimin e Qendrës së Votimit (574 përmes platformës elektronike http://qv.kqz-ks.org dhe 170 në zyrat e Komisioneve Komunale të Zgjedhjeve) prej të cilave janë aprovuar 725 kërkesa, ndërsa 19 të tjera janë refuzuar.
• Në kuadër të përgatitjeve për organizimin e Zgjedhjeve për Kuvendin e Kosovës, të cilat do të mbahen më 9 shkurt 2025, ka filluar programi orientues i trajnimit për anëtarët e Komisioneve Komunale të Zgjedhjeve. Deri më tani, seancat e trajnimit janë mbajtur me anëtarë të Komisioneve Komunale të Zgjedhjeve nga kmunat Mitrovicë e Jugut, Skënderaj dhe Vushtrri, Mitrovicë e Veriut, Zvçan, Leposaviq dhe Zubin Potok. Në ditët në vazhdim, programet e trajnimit do të mbahen edhe në regjionet tjera, si: Prishtinë, Prizren, Pejë, Gjilan, Ferizaj dhe Gjakovë.

Në vazhdim të mbledhjes, gjithashtu me qëllim të përgatitjes së Zgjedhjeve për Kuvendin e Kosovës, KQZ mori vendime për emërimin e dy anëtarëve të KKZ në komunat Obiliq dhe Ranilluk; zëvendësimin e dy anëtarëve të KKZ në komunat Junik dhe Mitrovica e Veriut; revokimin e emërimit të dy anëtarëve të KKZ në komunat Suharekë dhe Kamenicë dhe për përfundimin e mandatit të një anëtari të KKZ në komunën e Obiliqit.

Në këtë mbledhje, KQZ mori vendim për miratimin e rekomandimt të Zyrës për Regjistrim, Certifikim dhe Kontrollin Financiar të Subjekteve Politike (ZRCKFSP) për ndalimin e transferimit të mjeteve financiare nga Fondi, në vlerën e gjobës së shqiptuar, për subjektet politike të përfaqësuara në Kuvendin e Kosovës. Shuma e gjobës do të zbritet nga shuma e planifikuar t’i transferohet subjekteve politike për tremujorin e katërt të vitit 2024. Pas përfundimit të procesit të auditimit të raporteve vjetore financiare për subjektet politike, ZRCKFSP ka gjobitur disa subjekte politike pas gjetjeve të evidentuara gjatë auditimit.