Njoftim nga mbledhja e 43-të e KQZ-së
Prishtinë, 15 gusht 2024 – Komisioni Qendror i Zgjedhjeve mbajti mbledhjen e 43-të në këtë vit, të kryesuar nga kryesuesi i KQZ-së, Kreshnik Radoniqi.
Në këtë mbledhje, KQZ mori vendim për miratimin e Rregullores Zgjedhore Nr. 07/2024 për fushatën e zgjedhjeve, monitorimn dhe deklarimin financiar. Kjo rregullore është pjesë e akteve nënligjore të harmonizuara me Ligjin Nr. 08/L-228 për Zgjedhjet e Përgjithshme i miratuar në vitin 2023 nga Kuvendi i Republikës së Kosovës dhe përcakton procedurat për kufizimin e shpenzimeve të fushatës së zgjedhjeve, rregullat e fushatës së zgjedhjeve, monitorimin e fushatës së zgjedhjeve dhe deklarimin financiar për fushatën e zgjedhjeve.
Në vazhdim të mbledhjes, KQZ shqyrtoi edhe raportin përfundimtar “Auditimi i raporteve vjetore financiare të subjekteve politike – Pasqyrat financiare 2023”. Me qëllim të zbatimit të detyrimeve ligjore, në pjesën e parë të vitit 2024, Zyra për Regjistrim, Certifikim dhe Kontrollin Financiar të Subjekteve Politike ka përzgjedhur Auditorët për auditimin e raporteve financiare vjetore të partive politike të regjistruara në Republikën e Kosovës si dhe raportet e deklarimit financiar të fushatës së zgjedhjeve, për zgjedhjet e jashtëzakonshme për Kryetar të Komunave në komunat Leposaviq, Zubin Potok, Zveçan dhe Mitrovicë e Veriut dhe zgjedhjet e parakohshme për Kuvendet Komunale në komunat Zveçan dhe Leposaviq, të mbajtura më 23 prill 2024. Të gjitha raportet e audituara, janë publikuar në fillim të muajit korrik në ueb faqen e KQZ-së.
Në pikën tjetër të rendit të ditës, KQZ miratoi rishikimin e planit të punës së KQZ-së për vitin 2024
Gjithashtu, në vazhdim të mbledhjes KQZ shqyrtoi dhe miratoi video dhe radio spotet për fushatën informuese për votuesit jashtë Kosovës, të cilat tregojnë në mënyrë të detajuar për periudhën e aplikimit dhe të votimit.
Në pjesën e dytë të mbledhjes, KQZ shqyrtoi edhe disa çështje që kanë të bëjnë me personelin në KQZ, ku përfshihet zbatimi i planit të rekrutimit për vitin 2024 dhe aporvimi i listës së kandidatëve potencial për anëtar të komisionit të pranimit për pozitën Drejtor i Sekretariatit të KQZ-së.