KQZ vazhdon programin e trajnimit për Komisionet Komunale të Zgjedhjeve në regjionin e Gjilanit

Gjilan, 9/10 tetor 2024 – Komisioni Qendror i Zgjedhjeve është duke vazhduar me realizimin e programit orientues për anëtarët e Komisioneve Komunale të Zgjedhjeve të cilët janë emëruar nga KQZ për procesin e Zgjedhjeve për Kuvedin e Kosovës, të cilat do të mbahen më 9 shkurt 2025.

Gjatë ditës së mërkurë, seancat e trajnimit u mbajtën me anëtarë të Komisioneve Komunale të Zgjedhjeve nga komunat Gjilan, Kamenicë dhe Viti, ndërsa të enjten, me anëtarë të KKZ-ve nga komunat Novobërdë, Kllokot, Ranilluk dhe Partesh.

Programi i trajnimit ka për qëllim informimin e anëtarëve të Komisioneve Komunale të Zgjedhjeve lidhur me të drejtat dhe detyrimet e tyre ligjore gjatë ushtrimit të mandatit të tyre në Komisionin Qendror të Zgjedhjeve.

Gjatë programit të trajnimit, vëmendje e madhe do t’i kushtohet ndryshimeve në Ligjin për Zgjedhjet e Përgjithshme, i aprovuar nga Kuvendi i Kosovës në vitin 2023.

Deri më tani, programi i trajnimit është mbajtur edhe në regjionin e Mitrovicës, Pejës, Prizrenit, ndërkaq në ditët në vazhdim, të njëjtat do të mbahen edhe në regjionet tjera, si: Prishtinë, Prizren, Ferizaj dhe Gjakovë.

Në muajin shtator, Komisioni Qendror i Zgjedhjeve ka emëruar rreth 250 anëtarë të Komisioneve Komunale të Zgjedhjeve.

Sipas Ligjit Nr. 08/L-288 për Zgjedhjet e Përgjithshme, KKZ administron zgjedhjet brenda komunës përkatëse, nën mbikëqyrjen eksklusive dhe udhëzimet e KQZ-së, duke garantuar ligjshmëri, legjitimitet dhe efikasitet të procesit zgjedhor.