KQZ pranoi softuerin e zhvilluar me mbështetjen e OSBE-së dhe simuloi procesin e votimit
Prishtinë, 22 – 23 gusht 2024 – Në një ceremoni të organizuar në prani të deputetëve të Kuvendit të Kosovës, përfaqësuesve të institucioneve të ndryshme dhe të subjekteve politike, Komisioni Qendror i Zgjedhjeve pranoi softuerin për digjitalizimin e disa operacioneve zgjedhore të zhvilluar me mbështetjen e Misionit të OSBE-së në Kosovës.
Kryesuesi i KQZ-së, Kreshnik Radoniqi pranoi dosjen e softuerit nga Shefi i Misionit të OSBE-së në Kosovë, Michael Davenport.
Ky softuer, është krijuar në përputhje me kërkesat e reja që burojnë nga Ligji për Zgjedhjet e Përgjithshme i miratuar në vitin 2023 nga Kuvendi i Kosovës pas përfundimit të procesit të reformës zgjedhore.
Me këtë rast, Kryesuesi i KQZ-së, Radoniqi foli për rëndësinë e digjitalizimit të operacioneve zgjedhore, si një mënyrë për të përmirësuar shërbimet e ndryshme që ndërlidhen me aspekte të ndryshme të procesit zgjedhor.
“Në këtë kohë të zhvillimit të madh të teknologjisë, Komisioni Qendror i Zgjedhjeve po bënë hapa të konsiderueshëm në digjitalizimin e operacionave zgjedhore. Gjatë këtyre viteve, KQZ-ja në përmbushje të rolit të vet që buron nga Kushtetuta, ka punuar vazhdimisht për t’u përballur me sfidat e kohës dhe për ta përmirësuar edhe më tej organizimin e zgjedhjeve. Softueri i KQZ-së, i cili është zhvilluar me mbështetjen e Misionit të OSBE-së në Kosovë, ka për qëllim të avancojë shërbimet e institucionit për votuesit, subjektet politike dhe vëzhguesit e zgjedhjeve. Andaj, në emër të Komisionit Qendror të Zgjedhjeve, shpreh mirënjohjen për OSBE-në dhe ambasadorin Davenport, në ndihmën e dhënë në këtë drejtim, që padyshim se do të avancojë edhe më shumë procesin zgjedhor në Republikën e Kosovës, si themel për fuqizimin e demokracisë përmes zgjedhjeve”, tha Radoniqi.
Ndërkaq, shefi i Misionit të OSBEË-së në Kosovë, ambasadori Davenport u shpreh se softueri i zhvilluar është më shumë se vetëm avancim teknologjik.
“Ky softuer është më shumë se vetëm avancim teknologjik, ai përfaqëson përparim thelbësor në forcimin e demokracisë, rritjen e besimit të publikut dhe siguron që zgjedhjet në Kosovë të zhvillohen me integritet dhe transparencë maksimale, duke përdorur dy gjuhët zyrtare dhe duke pasur parasysh nevojat e të gjitha komuniteteve”, tha ambasadori Davenport.
Përmes këtij softueri do të ofrohen shërbime të ndryshme online, të cilt kanë të bëjmë me kërkimin e Qendrës së Votimit dhe aplikimin për ndryshimin e saj; aplikimin për regjistrimin e votuesve jashtë Kosovës; aplikimin për regjistrimin e votuesve me nevoja të veçanta; aplikimin për regjistrim dhe përditësimi i të dhënave të partive politike; aplikimin për certifikim të subjekteve politike dhe kandidatëve; aplikimin për akreditim për vëzhgim të zgjedhjeve; regjistrimin e të dhënave për trupat zgjedhore; aplikimin online për akreditimin e vëzhguesve; mbledhjen e të dhënave dhe paraqitjen e rezultateve preliminare dhe përfundimtare në mënyrë progresive.
Ceremonia e pranimit të këtij softueri u zhvillua në kuadër të aktivitetit të KQZ-së për simulimin e procesit të votimit në vendvotimin e rregullt, në vendvotimin me kusht, në vendvotimin në përfaqësi diplomatike, zbatimin e procedurave në Qendrat Komunale të Numërimit dhe në Qendrën e Numërimit dhe Rezultateve.
