KQZ me takime për sigurimin e procesit zgjedhor të barabartë dhe gjithpërfshirës

Prishtinë, 1 nëntor 2024 – Në kuadër të përgatitjeve për organizimin e Zgjedhjeve për Kuvendin e Kosovës, Komisioni Qendror i Zgjedhjeve është duke vazhduar me zhvillimin e takimeve të ndryshme, përmes së cilave synohet që të sigurohet proces zgjedhor i barabartë dhe gjithpërfshirës.

Gjatë ditës, zyrtarë të KQZ-së u takuan me përfaqësues të shoqatës HANDIKOS, me të cilët diskutuan për ndryshimet ligjore dhe për rëndësinë e pjesëmarrjes në zgjedhje të personave me nevoja të veçanta. Drejtuesit e HANDIKOS u njoftuan për afatet e vendosura nga KQZ për regjistrimin e votuesve me nevoja të veçanta, në mënyrë që në ditën e zgjedhjeve t’iu mundësohet votimi përmes ekipeve mobile në shtëpitë e tyre. Periudha për regjistrimin e votuesve me nevoja të veçanta do të fillojë në muajin janar të vitit 2025.

Drejtori i HANDIKOS, Afrim Maliqi dhe përfaqësues të tjerë, u shprehën të kënaqur për mundësitë që iu ofrohen votuesve me nevoja të veçanta gjatë procesit zgjedhor. Gjithashtu, drejtues të HANDIKOS rekomanduan që të krijohen kushte më të përshtatshme në qendra të votimit për qasjen e votuesve me nevoja të veçanta, siç janë pjerrinat në hyrje të tyre.

Në fund të takimit, u dakordua që të vazhdohet me bashkëpunimin në fushën e edukimit dhe informimit të votuesve me nevoja të veçanta.