Betohen dhjetë anëtarët e rinj të KQZ-së

20/05/2025

Prishtinë, 19 – 20 maj 2025 – Presidentja e Kosovës, Vjosa Osmani, në pajtim me kompetencat kushtetuese dhe ligjore, emëroi dhjetë anëtarët e Komisionit Qendror të Zgjedhjeve, sipas propozimeve të subjekteve politike të përfaqësuara në Kuvendin e Kosovës pas Zgjedhjeve për Kuvendin e Kosovës, të cilat u mbajtën më 9 shkurt 2025.

Gjatë ditës së hënë, ceremonia e betimit u zhvillua për anëtarët Sami Kurteshi, Ilir Gashi, Sami Hamiti, Muharrem Nitaj, Alban Krasniqi, Arianit Elshani, Gordana Laban, Mufera Srbica Şinik dhe Alfred Kinolli, ndërkaq të martën u betua anëtari, Almir Saiti. Në këtë ceremoni ishte i pranishëm edhe kryesuesi i KQZ-së, Kreshnik Radoniqi.

Anëtarët e KQZ-së u betuan se do t’i kryejnë detyrat e tyre në mënyrë të ndershme, besnike, të paanshme dhe profesionale.