

Në bazë të nenit 64.2, paragrafi (a) dhe (b), neni 128.2 dhe Kreu XII të Ligjit nr.03/L-073 për  Zgjedhjet e Përgjithshme në Republikën e Kosovës, Komisioni Qendror i Zgjedhjeve, me datën 24.02.2016, nxjerr:


RREGULLËN Nr. 19/2016
PËR KËSHILLAT E VENDVOTIMEVE


I. DISPOZITAT E PËRGJITHSHME

Neni 1
Qëllimi

Kjo rregull ka për qëllim të rregullojë: përbërjen dhe mënyrën e themelimit, nominimin nga subjektet politike, kualifikimin dhe kriteret për emërim të KVV-ve, emërimin e anëtarëve të KVV-ve, përfundimin e anëtarësisë në KVV, zëvendësimin e anëtarëve në KVV, të drejtat e anëtareve të KVV-së, detyrat e anëtareve të KVV-së, funksionimin e KVV-së, dokumentin e identifikimit (disktinktivin), kohën e punës së KVV-së, vendimmarrjen, dokumentacionin e KVV-së.

Neni 2
Përkufizimet

“LZP” - do të thotë: Ligji mbi Zgjedhjet e Përgjithshme.
“Komisioni“ - do të thotë: Komisioni Qendror i Zgjedhjeve, organ i pavarur i ekspertëve përgjegjës për administrimin e zgjedhjeve.
“Sekretariati” - do të thotë: Sekretariati i KQZ-së.
“Komisioni Komunal i Zgjedhjeve” (KKZ) - është organ përgjegjës për zbatimin e aktiviteteve zgjedhore brenda territorit të komunës.
“Parti politike“ - do të thotë një organizim i individëve, të cilët janë bashkuar vullnetarisht mbi bazën e ideve, të interesit dhe të pikëpamjeve të përbashkëta, me qëllim të ushtrimit të ndikimit dhe pasjes së përfaqësuesve të tyre të zgjedhur në zyrë publike, ose siç është e përcaktuar ndryshe me legjislacionin në fuqi.
“QNR “- do të thotë: Qendra e Numërimit dhe e Rezultateve.
“PZAP”- do të thotë: Paneli i Zgjedhjeve për Ankesa dhe Parashtresa.
“Qendra e Votimit” (QV) - do të thotë, ndërtesa ku ndodhen një apo më shumë vendvotime.
“VV” - do të thotë: Vendvotimi.
“KVV” - do të thotë: Këshilli i Vendvotimit.
“KKVV” - do të thotë: Kryesuesi i Këshillit të Vendvotimit.
“KRr “ - do të thotë: Kontrolluesi i rreshtit.
“ZI” - do të thotë: Zyrtari i identifikimit.
“ DHF” - do të thotë: Dhënësi i fletëvotimeve.
“ MKV” - do të thotë: Mbikëqyrësi i kutisë së votimit.
“LPV” - do të thotë: Lista përfundimtare e votuesve.
“LVK” - do të thotë: Lista votuesve me kusht.
“LveK” - do të thotë: Lista e votuesve e Komunës.
“FPR” - do të thotë: Formulari i përputhjes së të dhënave dhe rezultateve.
“FRK” - do të thotë: Formular i rezultateve të kandidateve.
“FK” - do të thotë: Fletëvotim me kusht.
“FLlK” - do të thotë: Fletë llogaritëse për kandidatin.
“ZFK” - do të thotë: Zarf i fletëvotimit me kusht.
“Komuniteti” - do të thotë banorët që i përkasin një grupi të njëjtë kombëtar, etnik, gjuhësor ose fetar, tradicionalisht të pranishëm në territorin e Kosovës.
“Subjekti politik“ - do të thotë parti politike, koalicion, nismë qytetare ose kandidat i pavarur.
“Subjekti(et) i certifikuar politik“ - do të thotë subjekti politik, që është partia politike, koalicioni i partive politike, nisma qytetare ose kandidati i pavarur, i cili është i certifikuar nga Komisioni, në përputhje me këtë ligj dhe me rregullat e Komisionit.
“ZLKZ” - do të thotë: Zyrtari i Lartë Komunal i Zgjedhjeve.


Neni 3
Përbërja dhe themelimi i KVV-ve

1. Këshilli i Vendvotimit ( ne tekstin e mëtejmë “KVV”) është trup zgjedhor, i cili është përgjegjës për përgatitjen dhe administrimin e procesit zgjedhor në vendvotim.

2. Përbërja e Këshillit të Vendvotimit reflekton strukturën e anëtarëve të KKZ-së. Komisioni Komunal i Zgjedhjeve mundet, në raste të veçanta, ta shtojë numrin e anëtarëve në Këshillin e Vendvotimit dhe për këtë menjëherë ta njoftojë Komisionin.
3. Këshilli i Vendvotimit, përbëhet nga: kryesuesi i KVV-së, Kontrolluesi i rreshtit, Zyrtari i identifikimit, Dhënësi i fletëvotimit, Mbikëqyrësi i kutisë së votimit. Ne rastet kur janë me shumë së pesë anëtarë, anëtari i gjashtë ndihmon zyrtarin e identifikimit dhe anëtari i shtatë ndihmon dhënësin e fletëvotimeve.

4. KVV-të emërohen nga Komisioni, sipas procedurave të parashikuara në kapitullin XII të LZP-së.

5. Në raste të caktuara, me propozim të KKZ-së, Komisioni mund të shtojë ose zvogëlojë numrin e anëtarëve të KVV-së.

6. Komisioni, me vendim mund të krijojë një KVV të dytë, vetëm për numërim të votave.

7. Në çdo Qendër të Votimit, caktohet një vendvotim i cili do të shërbejë si vendvotim i dyfishtë (si vendvotim për votimin e rregullt dhe me kusht). Në këtë rast, Këshilli i Vendvotimit do të jetë përgjegjës për udhëheqjen dhe mbikëqyrjen e procesit të votimit dhe numërimit të rregullt dhe me kusht, i cili zhvillohet në të njëjtin vendvotim.

Neni 4
  Nominimi i KVV-ve
  
1. Të drejtë nominimi për anëtarë të KVV-së kanë:

1.1 Subjektet politike të përfaqësuara në Kuvendin e Republikës së Kosovës dhe marrin pjesë në zgjedhjet aktuale.

1.2 Subjektet politike të përfaqësuara në Kuvendin Komunal dhe marrin pjesë në zgjedhjet aktuale.

2. Nëse nuk plotësohen kriteret nga paragrafi 1.1 dhe 1.2  i këtij neni, Sekretariati kërkon nga subjektet politike të reja (të certifikuara për zgjedhje), OJQ-të dhe organizata të tjera qytetare. t’i dorëzojnë nominimet plotësuese për KVV.

3. Në rast kur kemi numër te vogël të subjekteve politike të certifikuara, Komisioni me vendim mund të miratojë formulë tjetër nga paragrafët 1 dhe 2 të këtij neni, e cila garanton integritet të procesit zgjedhor, duke u bazuar në rezultatet e zgjedhjeve paraprake.

4. Nëse propozimet për KVV sipas paragrafëve 1, 2 dhe 3 të këtij neni nuk përmbushen, nominimet plotësuese do të bëhen nga KKZ-ja me miratimin paraprak të Komisionit.

5. Në kohën e përcaktuar nga Komisioni/Sekretariati, ftohen të gjitha subjektet politike, sipas paragrafëve 1, 2 dhe 3 të këtij neni, të dorëzojnë në KKZ nominimet për tu emëruar anëtarë të KVV-ve në komunat përkatëse.

6. Subjektet politike, nominimet e tyre në KKZ i dërgojnë në mënyrë elektronike dhe fizike, jo më vone se 5 ditë nga dita e pranimit të ftesës së bërë nga Sekretariati.

7. Lista e nominimeve duhet të përmbajë:

1.1 Kodin e komunës,
1.2 Emrin dhe numrin e QV-së,
1.3 Numrin e Vendvotimit,
1.4 Emrin dhe akronimin e subjektit politik ose OJQ-së,
1.5 Emrin e personit kontaktues me KKZ-në,
1.6 Emrin i të nominuarit,
1.7 Mbiemrin i të nominuarit,
1.8 Numrin personal të të nominuarit,
1.9 Datën e lindjes së të nominuarit,
1.10 Numrin e telefonit,
1.11 Numrin e llogarisë bankare për çdo të nominuar,
1.12 Përvojën në zgjedhje,
1.13 Shkollimin,
1.14 Pozitën e të nominuarit,
1.15 Nënshkrimin e personit kontaktues dhe vulën e subjektit politik ose OJQ-së,
1.16 Nënshkrimin e pranuesit të Listës nga përfaqësuesi apo Kryesuesi i KKZ-së,
1.17 Datën dhe vend i dorëzimit të Listës së nominimeve.

8. Subjektet me të drejtë nominimi do të bëjnë nomonime të veçanta për Këshillat e Vendvotimeve për votimin e personave me nevoja të veçanta.

9. Për numrin e nevojshëm do të vendosë KKZ-ja - varësisht prej numrit të ekipeve mobile.


Neni 5
Kualifikimi dhe kriteret për emërim të KVV-ve

1. Për t’u nominuar dhe emëruar për anëtarë të KVV-së, personi duhet:

1.1 Të jetë votues i regjistruar në të njëjtën komunë ku është e vendosur Qendra e Votimit - Vendvotimi.
1.2 Të dijë shkrim dhe lexim të gjuhëve zyrtare për atë komunë.
1.3 Të ketë përvojë në zgjedhje.
1.4 Të ketë të kryer të paktën shkollimin e mesëm.

2. Asnjë person nuk mund të nominohet e as emërohet për kryesues e as anëtar i KKV-së, nëse ai/ose ajo, është:

2.1 Kandidat për funksion të zgjedhur në Republikën e Kosovës,
2.2 Anëtar i Kuvendit Komunal, Kuvendit të Kosovës dhe çdo organ tjetër të zgjedhur brenda dhe jashtë Kosovës,
2.3 Anëtar i ndonjë KKZ-je Sekretariati ose Komisioni,
2.4 Pjesëtar i Policisë së Kosovës,
2.5 Pjesëtar i Forcave të Sigurisë të Kosovës ose pjesëtar i ndonjë shërbimi tjetër ushtarak, të sigurisë ose inteligjencës,

2.6 I është marrë aftësia për veprim përmes një vendimi përfundimtar gjyqësor,
2.7 Është shpallur fajtor për vepër penale gjatët re (3) viteve të fundit me vendim përfundimtar gjyqësor.
2.8 Paraprakisht, me vendim të Komisionit apo PZAP-së, është vërtetuar që ka cenuar procesin zgjedhor, apo secili ndaj të cilit është duke zhvilluar procedurë penale për vepër penale nga kapitulli XVIII i Kodit Penal të Kosovës.  

3. 	Për t’u emëruar Kryesues i KVV-së, preferohet të ketë shkollim universitar, së paku shkollën e mesme. 

Neni 6
Emërimi i anëtarëve dhe kryesuesve të KVV-ve

1. KKZ-ja, pas pranimit të Listës së të nominuarve për KVV, ua cakton Qendrën/Vendvotimin dhe pozitën duke zbatuar rregullat, si në vijim:

1.1. Një SP nuk mund të ketë më shumë se një përfaqësues në KVV, që do të shërbejë qoftë si kryesues ose anëtar i KVV-së.

1.2. Nga të nominuarit, përparësi u jepet kandidatëve me kualifikim më të mirë dhe atyre që kanë përvojë në zgjedhje.

1.3. Nuk mund të emërohet më shumë se një person prej familjes së ngushtë në të njëjtin KVV, pavarësisht se mund të jenë nga SP të ndryshme (familjar të ngushtë përfshinë: bashkëshortët, fëmijët, prindërit dhe motrat apo vëllezërit).

1.4. Të nominuarit emërohen në të njëjtën Qendër të Votimit/Vendvotimin ku është i regjistruar për të votuar apo të paktën në qendrën me të afërt ku ka për të votuar.

2. KKZ-ja pranon listën e nominimeve për KVV nga subjektet politike dhe e dërgon në Sekretariat për rekomandim në Komision për emërim, jo më vonë se 5 ditë pune nga dita e pranimit të nominimeve, ndërsa Komisioni bën emërimin e KVV-ve, duke përfshirë dhe stafin rezervë për KVV, jo me vonë se 4 ditë nga dita e pranimit të Listës nga Sekretariati.

3. Kryesuesit e KVV-ve zgjedhen në mënyrë të barabartë nga katër subjektet e para që kanë fituar numrin më të madh të votave për Parlamentin e Kosovës gjatë zgjedhjeve të fundit në atë komunë, dhe janë certifikuar për pjesëmarrje në zgjedhje aktuale.

4. Caktimi i Kryesuesve në vendvotime, sipas paragrafit 3 të këtij neni, bëhet përmes formulës së rotacionit të cilën e zbaton KKZ-ja, sipas renditjes së votave që kanë fituar në zgjedhje.


5. Çdo KVV miratohet nga Komisioni dhe udhëhiqet nga kryesuesi.

6. Subjektet politike me të drejtë nominimi për KVV, kanë të drejtë të nominojnë për emërim 10% nga numri i përgjithshëm i anëtarëve për KVV-të, si anëtarë dhe kryesues rezervë.

7. Pas emërimit, secili anëtar/kryesues i KVV-së, është i obliguar të nënshkruajë Marrëveshjen e Veçantë mbi Shërbimin dhe  Kodin e Sjelljes.


Neni 7
Përfundimi i anëtarësisë në KVV

1. Komisioni mund të revokojë në çdo kohë emërimin e secilit anëtar të KVV-së, nëse anëtari:

1.1. Nuk merr pjesë në sesionet e trajnimit të organizuar nga KKZ,
1.2. Ka vijuar trajnimet por nuk punon një ditë para dhe në ditën e zgjedhjeve,
1.3. I cili nuk mund ta kalojë testin pas sesionit të trajnimit,
1.4. Vepron në kundërshtim me LZP, Kodin e  Mirësjelljes dhe aktet tjera të Komisionit,
1.5. Jep dorëheqje për shkaqe personale apo shkarkohet nga subjekti që e ka nominuar,
1.6. Për çfarëdo arsye nuk është i gatshëm, ose nuk ka mundësi të kryej obligimet e veta.

2. Shkarkimi dhe zëvendësimi i anëtarëve të KVV-se bëhet me propozim të KKZ-së dhe miratim të Komisionit.

3. Anëtari i KVV-së i shkarkuar me vendim të Komision, nuk mund të rizgjidhet më në këtë detyrë.


Neni 8
Zëvendësimi i anëtarëve të KVV-së

1. Për të gjitha rastet e parapara në nenin 7 të kësaj rregulle, anëtari i KVV-së zëvendësohet nga KKZ-ja me një anëtar rezervë të trajnuar, të të njëjtit subjekt politik dhe të emëruar nga Komisioni.

2. Subjekti politik mund të kërkojë përmes KKZ-së tek Komisioni, që të bëj zëvendësimin e anëtarit të emëruar, jo me vonë se dhjetë ditë para ditës së zgjedhjeve. 


Neni  9
Të drejtat anëtarëve të KVV-së

1. Çdo anëtar i KVV-së, duke përfshirë edhe anëtarët rezervë, kanë të drejtën e shpërblimit për punën e bërë.

2. Lartësia e shpërblimit përcaktohen me vendimin e Komisionit.

3. Çdo anëtar i KVV-së ka të drejtë të komunikojë dhe informojë KKZ-në për çdo problem që ai e sheh të arsyeshëm.

4. Çdo anëtar ka të drejtë të njoftohet me vendimet e Komisionit dhe KKZ-së.

5. Të gjithë Kryesuesit e KVV-ve duhet që në seancat e trajnimit të pajisen nga KKZ-ja me orarin mbi pranimin e materialit jo të ndjeshëm, dhe materialit të ndjeshëm.

6. Kryesuesi duhet që me rastin e pranim-dorëzimit të materialit të ndjeshëm, të pajisen me një kopje të formularit mbi pranim-dorëzimin.

7. Kryesuesi dhe anëtaret e KVV-së, votojnë të parët, mirëpo vetëm pasi të hapet vendvotimi, pra jo me herët se ora 7:00.

8. Kryesuesi dhe anëtarët e KVV-së, nëse janë caktuar për të punuar në qendrën dhe vendvotimin jo adekuat, mund të votojnë me kusht në vendvotimin e dyfishtë ose në QV-në dhe vendvotimin e rregullt të tyre, por me lejen e Kryesuesit të KVV-së, por jo më shumë se një anëtar njëkohësisht.


Neni 10
Detyrat e kryesuesit dhe të anëtarëve të KVV-së, para, gjatë dhe pas procesit zgjedhor

1. KVV-ja ushtron veprimtarinë e vet në mënyrë profesionale, të paanshme  dhe në shërbim të gjithë votuesve.
2. Kryen aktivitetet para ditës së zgjedhjeve, në ditën e zgjedhjeve dhe gjatë procesit të zgjedhjeve, siç janë: vijimi i trajnimit, pranimi  dhe verifikimi i materialit zgjedhor, kontrollimi i pajisjeve dhe etiketimi i materialit zgjedhor, përgatitja dhe rregullimi i vendvotimit, zbatimi i drejtë i procesi të votimit dhe numërimit, raportimi lidhur me hapjen dhe mbylljen e QV/vendvotimeve, raportimi lidhur me përqindjen e daljes së votueseve, paketimi dhe transportimi i materialit zgjedhor në depon e KKZ-së.
3. Kryesuesi i KVV-së, së bashku me anëtarët e KVV-së, është përgjegjës për funksionimin e përgjithshëm të vendvotimit dhe detyrave të tjera të paraqitura në rregullat e Komisionit, dhe për të gjitha aktivitetet në vendvotimin e tij, prej procesit të pranimit, e deri të bëhet dorëzimi i materialit në Depon e KKZ-së.

4. Kryesuesi i vendvotimit mund të vendos për zvogëlimin e numrit të vëzhguesve në vendvotim, sipas rrethanave të krijuara.

5. KVV-ja informon KKZ-në drejtpërdrejt ose përmes Menaxherit të QV-së, për anëtarët e KVV-së që mungojnë dhe kërkon zëvendësim e tyre. Nëse mungon kryesuesi, atëherë njëri nga anëtaret e KVV-së kryen detyrën e kryesuesit të vendvotimit përkohësisht, deri sa KKZ-ja të bëj zëvendësimin e ri.

6. Subjektet politike dhe OJQ-të, janë përgjegjëse për të nominuarit e tyre që ata të ndjekin seancat e trajnimit të organizuar nga KKZ-ja.

7. Kryesuesi i KVV-së dhe anëtarët e KVV-së duhet të kryejnë obligimet konform Doracakut mbi Trajnimin për Procedurat e Votimit dhe Numërimit në Vendvotim dhe rregullave të Komisionit.

8. Kryesuesi i KVV-së bën pranimin e materialit jo të ndjeshëm një ditë para ditës së zgjedhjeve dhe materialin e ndjeshëm në ditën e zgjedhjeve, konform Planit Operacional të KKZ-së.

9. Një kopje e Formularit mbi pranim-dorëzimin, mbetet në zyrat e KKZ-së dhe një kopje e mban Kryesuesi i KVV-së.

10. Nëse mungon ndonjëri nga anëtarët e KVV-së, kryesuesi i KVV-së përmes Menaxherit të QV-së, duhet të kërkojë anëtar rezervë nga KKZ-ja nga i njëjti Subjekt Politik.

11. Nëse mungon ndonjë artikull, duhet të njoftohet menaxheri i QV-së, i cili e njofton dhe kërkon nga KKZ-ja që të sillen furnizimet e nevojshme në VV.

12. Anëtarët e KVV-së nuk mund të dalin apo të largohen nga vendvotimi dhe Qendra e Votimit, pa lejen e kryesuesit te  KVV-së.

13. Një VV do të lejohet të hapet me një numër minimal prej tre (3) anëtarësh të KVV-së, por nuk mund të funksionojë me më pak se 5 anëtarë gjatë tërë procesit zgjedhor.

14. Të shënojë në Librin e Votimit emrat dhe numrat personal të letërnjoftimeve të të gjithë anëtarëve të KVV-së.

15. Të shënojë në Librin e Votimit emrat, mbiemrat dhe numrat personal të letërnjoftimeve dhe numrat e akreditimit (distinktivëve të vëzhguesve) të të gjithë vëzhguesve të akredituar të pranishëm,  dhe t’u rikujtojë atyre obligimet dhe të drejtat e tyre si vëzhgues.


16. Kryesuesi i KVV-së shpall hapjen e Vendvotimit dhe fillimin e procesit të votimit, në orën 07:00.

17. Kryesuesi i KVV-së, së paku me një anëtar të KVV-së, është përgjegjës për paketimin në përputhje me procedurat e përshkruara në Diagramin e paketimit dhe dërgimin e materialit zgjedhor të VV-së, tek depoja komunale e KKZ-së.

18. Kryesues i KVV-së i VV-së së rregullt, do të grumbullojë tërë materialin jo të ndjeshëm, të cilin do ta vendosë në thes. Ndërsa në VV-në e dyfishtë, do ta grumbullojë tërë materialin jo të ndjeshëm në kutinë e zbrazët të votimit me kusht, dhe të njëjtit do t’i dorëzojnë në depon e KKZ-së, bashkë me kutitë e votimit.

19. Vendvotimi duhet të lihet i pastër, orenditë duhet të kthehen në vendin e tyre të duhur. Të gjithë posterët dhe materiali zgjedhor duhet të largohen dhe të gjitha mbeturinat duhet hedhur në mënyrë adekuate.

20. Sipas udhëzimeve të KKZ-së, Kryesuesi i KVV-së dhe se paku një anëtar, do t’i transportojnë të gjitha materialet zgjedhore deri në depon komunale të KKZ-së.

21. Nëse paketimi nuk është bërë sipas procedurave të përshkruara në Diagramin e paketimit, KKZ-ja ka të drejtë të urdhërojë paketimin e duhur.

22. Kryesuesi i KVV-së është përgjegjës për mbarëvajtjen e procesit zgjedhor, përfshirë edhe saktësinë e plotësimit të formularëve. 

23. Në rast të mos përmbushjes së detyrave të përcaktuara me këtë nen, Komisioni mund t’ia zbres pagesën. 


Neni 11
Funksionimi i KVV-së

1. KVV-ja duhet të funksionojë me së paku 5 anëtarë të KVV-së, gjatë tërë procesit zgjedhor.

2. Vendvotimi lejohet të hapet me një numër minimal prej tre (3) anëtarësh të KVV-së.

3. Këshilli i Vendvotimit ka këto pozita/funksione :

3.1. Kryesuesi i KVV-së,
3.2. Kontrolluesi i rreshtit (K. Rr),
3.3. Zyrtari i identifikimit (Zyrtari i ID),
3.4. Dhënësi i fletëvotimit (Dh. F),
3.5. Mbikëqyrësi i kutisë së votimit (MKV),
      3.6. Ndihmësi i zyrtarit te identifikimit dhe
      3.7. Ndihmësi i dhënësit të fletëvotimit.

Neni 12
Dokumenti i identifikimit (distinktivi)

Gjatë ushtrimit të detyrës, anëtarët e KVV-së janë të detyruar të mbajnë në mënyrë të dukshme dokumentet e identifikimit (distinktivin), sipas dizajnit të miratuar nga Komisioni.

Neni 13
Orari i punës së KVV-së

1. Orari i punës për KVV, konsiderohet:
1.1. 	Trajnimi sipas Planit Operacional të KKZ-së,
1.2.	Një ditë para ditës së zgjedhjeve, KVV-të pranojnë materialin zgjedhor jo të ndjeshëm, sipas Planit Operacional të KKZ-së,
1.3.	Në ditën e zgjedhjeve, deri në përfundimin e procesit të votimit dhe numërimit, ndërsa kryesuesit e KVV-së deri në dorëzimin e materialit zgjedhor në depon e KKZ-së.


Neni  14
Vendimmarrja

1. Ne rastet kur vendimi është në kuadër të përgjegjësive të kryesuesit të KVV-së, vendimi i tij është përfundimtar në vendvotim. Nëse ndonjë anëtar i KVV-së ose vëzhgues i akredituar nuk pajtohet me vlerësimin e kryesuesit të KVV-së për një fletëvotim të caktuar, ai mund të paraqesë ankesë pranë Panelit Zgjedhor për Ankesa dhe Parashtresa.

2. Vendimet nga përgjegjësitë e KVV-së merren me shumicën e votave të të gjithë anëtarëve të KVV-së, prezentë në KVV.

3. 	Kryesuesi i KVV-së, nëse është i mendimit se numri i vëzhguesve të akredituar të pranishëm brenda në Vendvotim (VV) është duke penguar procesin e votimit apo numërimit, ai/ajo duhet t’i urdhërojë vëzhguesit që ta lirojnë VV-në, me arsyen që të njëjtën kohë mos të ketë më shumë se një vëzhgues nga një organizatë. 


Neni 15
Konflikti i interesit

Konflikt i interesit ekziston kur emërohet më shumë se një person prej familjes së ngushtë në të njëjtin KVV, pavarësisht se mund të jenë nga subjekte të ndryshme politike (familje e ngushtë përfshinë: bashkëshortët, fëmijët, prindërit, motrat dhe vëllezërit).


Neni 16
Dokumentacioni i KVV-së

1. Kryesuesi i KVV-së, bashkë me anëtarët e KVV-së, është përgjegjës për pranimin, mirëmbajtjen dhe kthimin e materialit zgjedhor jo të ndjeshëm dhe të ndjeshëm, të cilin e ka pranuar nga KKZ.

2. Komisioni do të krijojë kushte që secili anëtar i KVV-së të pajiset me kopjet e formularëve të cilët ai i nënshkruan, përmes fotokopjimit, fotografimit ose përshkrimit. 

Neni 17
Dispozitat përfundimtare

Çështjet që lidhen me punën e KVV-ve, e që nuk janë të rregulluara me këtë rregullore, përcaktohen me vendim ose me ndonjë akt tjetër të Komisionit, në përputhje me LZP.

Pjesë përbërëse të kësaj rregulle, janë shtojcat:


Shtojca I- Formulari i nominimeve nga subjektet politike,
Shtojca II - Formulari i propozimeve nga KKZ-në në Komision,
Shtojca III - Kodi i sjelljes për anëtarët e KVV-së


Neni 18
Hyrja në fuqi


Kjo Rregull  hyn në fuqi më datë  24.02.2016


Kryetari i  Komisionit Qendror të Zgjedhjeve
                                                                                    
                                                                                              _____________________________
      
      Valdete Daka
1